Mash`al — yangiliklari Transfer

Muborakning «Mash'al» futbol klubi tarkibini tajribali futbolchi bilan kuchaytirishda davom etmoqda.

Nigeriyalik yarim himoyachi Ifeanyi Ifeanyi klubimiz bilan 2026-yil yakuniga qadar mo'ljallangan yarim yillik shartnoma imzoladi.

30 yoshli futbolchi markaziy yarim himoya chizig'ida harakat qiladi. Shuningdek, u hujumkor va tayanch yarim himoyachi pozitsiyalarida ham o'ynay oladi. Ifeanyi Nigeriya milliy terma jamoasi safida ham to'p surgan tajribali futbolchi hisoblanadi. Futbolchilik faoliyati davomida «MFM», «Akwa United», Jazoirning «ES Setif», Iroqning «Newroz» va «Al-Najaf», shuningdek, O'zbekistonning «Qizilqum» klublarida faoliyat olib borgan.

Ifeanyi Ifeanyi «Mash'al» uchun begona emas. U 2020–2021-yilgi mavsumda jamoamiz sharafini munosib himoya qilgan va endi yana jamoaga yordam berish, o'zining boy tajribasini ishga solish uchun Muborakka qaytmoqda.

«Mash'al» futbol klubi Ifeanyi Ifeanyini yana o'z safiga qaytgani bilan qutlaydi va unga jamoamiz bilan yangi muvaffaqiyatlar tilaydi!

Mash'al klubi Doniyor Narzullayev hamda Tojiddinovni O'zbekiston Superligasi uchun ro'yxatdan o'tkazdi.

Mash'al chernogoriyalik markaziy himoyachi Drago Bumbar bilan mehnat shartnomasi imzoladi.

28 yoshli futbolchi 1997 yil 10 noyabrda Chernogoriyaning Kotor shahrida tavallud topgan. Uning bo'yi 193 santimetr bo'lib, asosan markaziy himoyachi sifatida harakat qiladi. Zarur holatlarda o'ng qanot himoyasida ham o'ynay oladi. O'ng oyoqli futbolchi jismoniy kuchi, havodagi kurashlardagi ustunligi va ishonchli himoyaviy harakatlari bilan ajralib turadi.

Faoliyati davomida Chernogoriya, Serbiya va Albaniya chempionatlarida to'p surgan Bumbar so'nggi mavsumlarda Chernogoriya Premer-ligasining Bokel klubi sharafini himoya qildi. U professional faoliyati davomida 165 ta rasmiy uchrashuvda maydonga tushgan.

Drago Bumbarning xalqaro tajribasi va himoya chizig'idagi barqaror o'yini Mash'alning yangi mavsum oldidan oldiga qo'ygan vazifalarini bajarishda muhim ahamiyat kasb etishi kutilmoqda.

Mash'al futbol klubi Drago Bumbarga muboraklik tilaydi va jamoamiz safida omadli o'yinlar, yorqin g'alabalar hamda muvaffaqiyatli faoliyat tilab qoladi!

Muborakning Mash'al futbol klubi Superliga restarti oldidan tarkibni kuchaytirish ishlarini davom ettirmoqda. Jamoa tajribali qanot hujumchisi Doniyor Narzullayev bilan shartnoma imzoladi.

31 yoshli futbolchi 1995 yil 11 aprel kuni Qarshi shahrida tavallud topgan. U asosan o'ng qanot hujumchisi sifatida harakat qiladi, shuningdek, chap qanot va hujumkor yarim himoyachi pozitsiyalarida ham samarali o'ynay oladi.

Doniyor Narzullayev faoliyati davomida O'zbekistonning qator jamoalari sharafini himoya qilgan bo'lib, Superliga va Pro ligada katta tajriba to'plagan. U yoshlar terma jamoalarida ham to'p surgan va O'zbekiston U-23 terma jamoasi safida maydonga tushgan.

Tezkorligi, driblingi va hujumda xavfli vaziyatlar yarata olishi bilan ajralib turadigan futbolchining Mash'al hujum chizig'iga yangi impuls olib kirishi kutilmoqda.

Muborakning «Mash'al» futbol klubi Superliga ikkinchi davrasi oldidan tarkibni kuchaytirish ishlarini davom ettirmoqda. Jamoa o'zbekistonlik himoyachi Bobirjon Asqarov bilan shartnoma imzoladi.

27 yoshli futbolchi 1999-yil 2-sentabrda Toshkent shahrida tavallud topgan. U asosan markaziy himoya chizig'ida harakat qiladi, zarurat tug'ilganda tayanch yarim himoyachisi sifatida ham samarali o'ynay oladi. Shuningdek, u O'zbekiston U-23 terma jamoasi safida ham to'p surgan.

Futbolchilik faoliyati davomida Asqarov «Paxtakor» va «Lokomotiv» klublari sharafini himoya qilgan. U «Paxtakor» safida O'zbekiston Superligasi chempioni va mamlakat Kubogi sohibi bo'lgan. Shuningdek, «Lokomotiv» bilan Pro-liga chempionligini qo'lga kiritgan.

Markaziy himoyadagi tajribasi va g'oliblik ruhi bilan jamoamizga katta foyda keltirishiga ishonamiz. Xush kelibsiz, Bobirjon Asqarov! «Mash'al» safida omad va yorqin g'alabalar tilaymiz!

Ifeanyi Ifeanyi "Mash'al" jamoasiga qaytdi. 🔵

"Mash'al" klubi o'z tarkibini yangi futbolchi bilan kuchaytirdi. Muborakliklar chernogoriyalik himoyachi Drago Bumbar bilan shartnoma imzoladi.

"Mash'al" futbol klubi tarkibida ko'p yillar davomida samarali faoliyat olib borgan futbolchilar Shahboz Jo'rayev hamda Samandar Ochilov bilan tuzilgan mehnat shartnomalari o'zaro kelishuvga asosan bekor qilindi.

Har ikki futbolchi klubimiz safida o'zining mehnatsevarligi, fidoyiligi va jamoaga sadoqati bilan muxlislar mehrini qozondi. Ular "Mash'al" sharafini munosib himoya qilib, jamoamizning yutuqlari yo'lida munosib hissa qo'shishdi.

"Mash'al" futbol klubi rahbariyati, murabbiylar shtabi, futbolchilar hamda ko'p sonli muxlislar nomidan Shahboz Jo'rayev va Samandar Ochilovga klubimiz rivojiga qo'shgan munosib hissasi, halol mehnati va fidokorona xizmatlari uchun samimiy minnatdorchilik bildiramiz.

Aziz futbolchilarimizga kelgusi faoliyatlarida muvaffaqiyat, mustahkam sog'liq, yangi jamoalarida ulkan zafarlar va faoliyati davomida yuksak natijalar tilaymiz.

Sizlar har doim "Mash'al" oilasining bir qismi bo'lib qolasizlar. Omad yor bo'lsin!

Muborakning Mashal futbol klubi yangi mavsum oldidan tarkibini kuchaytirishda davom etmoqda. Klub rossiyalik darvozabon Vladislav Rusanov bilan mehnat shartnomasi imzoladi.

24 yoshli posbon 2001-yil 1-avgust kuni Rossiyaning Sankt-Peterburg shahrida tug'ilgan. Uning bo'yi 2,00 metr bo'lib, darvozabon pozitsiyasida harakat qiladi.

Futbolchilik faoliyati davomida Belarusning Energetik-BGU hamda Rossiyaning Leon Saturn jamoalari sharafini himoya qilgan. So'nggi ikki yarim mavsumda Leon Saturn safida 50 dan ortiq rasmiy uchrashuvda maydonga tushib, o'zini ishonchli darvozabon sifatida namoyon etgan.

Mashal futbol klubi Vladislav Rusanovni jamoamiz safiga qo'shilgani bilan tabriklaydi va unga Muborakdagi faoliyati davomida omad, mustahkam sog'liq hamda yorqin g'alabalar tilaydi.

Muborakning Mash'al futbol klubi tarkibni kuchaytirish ishlarini davom ettirmoqda. Jamoa o'zbekistonlik himoyachilar Tohir To'xtasinov hamda Farrux Ibragimov bilan shartnoma imzoladi.

22 yoshli Tohir To'xtasinov asosan chap qanot himoyachisi sifatida harakat qiladi. U faoliyati davomida So'g'diyona sharafini himoya qilgan hamda O'zbekiston U-20 yoshlar terma jamoasi safida 4 ta uchrashuvda maydonga tushgan. Tezkorligi, hujumga faol qo'shilishi va qanotdagi ishonchli o'yini bilan ajralib turadigan futbolchi Mash'al himoya chizig'ida raqobatni yanada kuchaytirishi kutilmoqda.

Farrux Ibragimov esa 1996 yil 15 may kuni Toshkent shahrida tug'ilgan. U markaziy himoyachi sifatida to'p suradi, shuningdek, zaruratga qarab chap va o'ng qanot himoyasida ham harakat qila oladi. Faoliyati davomida O'zbekiston chempionatining bir qator jamoalari safida o'ynab, Superliga va Pro-ligada boy tajriba to'plagan. So'nggi mavsumlarda esa Xorazm sharafini himoya qilib kelgan.

Mash'al futbol klubi Tohir To'xtasinov va Farrux Ibragimovni jamoamiz safiga qo'shilgani bilan samimiy qutlaydi. Ularga Muborak klubi safida muvaffaqiyatli mavsum, omadli o'yinlar, mustahkam sog'liq va yorqin g'alabalar tilaymiz!