#Koul Palmer — yangiliklari

Koul Palmer "Tottenhem"ga qarshi o'yin oldidan matbuot anjumanida qatnashdi. Quyida uning asosiy fikrlari keltirilgan:

Rodjers haqida:

U qanchalik kuchli futbolchi ekanligini hamma biladi. U mening eng yaqin do'stlarimdan biri, shuning uchun uning jamoamizga o'tganidan juda xursandman. Biz doimo aloqadamiz, shuning uchun "Chelsi" uni sotib olmoqchi ekanligini eshitganimda, unga tezroq o'tishini aytib, tinimsiz yozardim. Balki u o'sha paytda mendan juda charchab ketgandir!

Endi u shu yerda ekanligidan mamnunman va maydonga birga tushadigan kunni intizorlik bilan kutyapman.

U o'tishini menga darhol aytgandi, lekin biz buni sir saqladik. Rostini aytsam, bu qiyin bo'ldi!

Fikrimcha, biz turlicha o'yinchi bo'lsak-da, ikkalamiz ham jamoaga ko'p narsa bera olamiz. U ham to'p bilan, ham to'psiz harakatlarda mendan ko'ra baquvvatroq. Qolaversa, u men uzatma berishni xush ko'radigan zonalarga yorib kirishni yaxshi ko'radi.

Biz birga juda yaxshi o'ynay olamiz deb hisoblayman. Ayniqsa, yoshlar darajasida ham birga to'p surganmiz.

Xabi Alonso haqida:

Xabi bizga kelguniga qadar u bilan gaplashishga ulgurgandim. Jahon chempionati uchun tarkibga kirmay qolganimda u menga yozgandi. Bu juda yoqimli holat edi.

Hozirgi vaqtda uning qo'l ostidagi mashg'ulotlar juda yaxshi o'tmoqda. U va uning shtabi bizga juda yaxshi munosabatda, ular bilan ishlashdan zavq olyapmiz.

Xabi meni bo'sh zonalarga yorib kiradigan "o'nlik" pozitsiyasida ko'rayotganini aytdi.

O'zimni yaxshi his qilyapman. Mavsumga tayyorgarlik ko'rish uchun yetti haftam bor edi, shuning uchun endi tayyorman.

Ertangi o'yin haqida:

Biz o'yinni intizorlik bilan kutyapmiz, ayniqsa chiptalar to'liq sotilib bo'lgani va "Tottenhem"ga qarshi bahslar doimo sifatli futbol va'da qilgani uchun.

Ha, bu mavsumoldi tayyorgarlik, lekin bunday jamoalarga qarshi o'ynash doim yaxshi. Raqobat ruhi albatta bo'ladi, lekin eng muhimi — mavsumga tayyorgarlik. O'rtoqlik o'yinlari aynan shu uchun kerak.

Yangi mavsumni intiqlik bilan kutyapman. Yozni a'lo darajada o'tkazdim, avval hech qachon bo'lmaganidek, naq yetti haftalik ta'tilga ega bo'ldim. Ta'tilni oilam bilan o'tkazdim, shuning uchun yangi mavsum boshlanishi oldidan o'zimni ayniqsa tetik his qilyapman.

🎙️ Koul Palmerning "Tottenxem"ga qarshi o'yin oldidan matbuot anjumani [2-qism]:

💬 O'tgan mavsum jarohat tufayli og'ir kechdi — bu faoliyatingizdagi birinchi jiddiy jarohat bo'lsa kerak. O'yiningizdan kutgan natijalarni bera olmagan paytingizda buni qanday yengib o'tdingiz?

Ochig'ini aytsam, buni qanday yengib o'tishni unchalik tushunmadim. Jarohatdan keyingi dastlabki oylar maydonga tezroq qaytishni istadim. Balki, buni qilmasligim kerak edi, chunki o'zim istagandek o'ynay olmasdim. Shaxsiy nuqtai nazardan jarohatlar sabab mavsum omadsiz chiqdi. Ammo hozir o'zimni yaxshi his qilyapman. Yetti haftalik dam olish menga juda yordam berdi. Endi yana o'ynashga tayyorman.

💬 Operatsiya masalasi ko'rib chiqilganmi?

Ha. Shifokor huzuriga borgandim… Qayerdaligini aniq eslolmayman — adashmasam, Shvetsiya yoki Daniyada, o'sha davlatlardan birida. Operatsiya haqida gaplashdik, lekin yakunda undan voz kechishga qaror qildik.

💬 Morgan haqida gaplashamiz. Hamma sizning nishonlashingizni muhokama qilyapti. Unga "Tegma, bu meniki" dedingizmi yoki birga nishonlashni rejalashtiryapsizmi?

Bu voqeani siz, jurnalistlar bo'rttirib yubordingiz. Biz buni hatto bir marta ham muhokama qilmaganmiz. Shunchaki shunday bo'lib qoldi — u bu nishonlashni amalga oshiryapti, men ham.

💬 Ya'ni?

Men bu nishonlashni allaqachon patentlab qo'yganman. Agar Morgan biror narsa qilishga urinib ko'rsa, uning eshigini sud ijrochilari taqillatadi [kuladi].

💬 Agar jiddiy gapirsak?

O'ylaymanki, birga nishonlaymiz.

💬 O'tgan o'yinda o'nta gol urdingiz, juda tomoshabop bo'ldi. Ammo yana to'rtta gol o'tkazib yuborishni istamasangiz kerak. Baribir "Chelsi" — "Tottenxem" qarama-qarshiligi, hatto Avstraliyadagi o'rtoqlik o'yini bo'lsa ham, o'zgacha ahamiyatga ega?

O'ylaymanki, bu o'yin doim o'zgacha bo'lib qoladi. Lekin baribir bu shunchaki mavsumoldi o'yini. Hozir bizning asosiy vazifamiz — mavsumga yaxshilab tayyorgarlik ko'rish.

💬 "Vestern Sidney" o'yinchisi Jared bilan o'yindan so'ng futbolka almashganingizni ko'rdim. Bu yerga kelib, bunday munosabatni ko'rish qanday tuyg'u? Mahalliy o'yinchilar va muxlislar uchun sizlar haqiqiy kumirsizlar.

U o'yin davomida futbolka almashishimiz mumkinmi deb so'radi va men rozi bo'ldim. O'shanda uning "Chelsi" muxlisi ekanligini ham bilmasdim. O'yindan keyin bularning hammasini Instagram'da ko'rdim. Ochig'i, endi futbolkani aynan unga berganimdan juda xursandman.

💬 Mashg'ulotlarning birida sizni Mahdi Nikoll-Jazuli bilan birga ko'rishdi — Sidneyda yashovchi mahalliy yigit. Munosabatlaringiz haqida gapirib bersangiz va uning iqtidori haqida nima deb o'ylaysiz?

Ha, u quvnoq yigit, o'ziga juda ishonadi. U atigi 16 yoshda, lekin bunday klubda o'ynash uchun barcha sifatlarga ega. Balki, keyingi mavsumdayoq tayyor bo'lar. Ammo hammasi uning o'ziga bog'liq — agar mehnat qilishda davom etsa va to'g'ri kayfiyatni saqlab qolsa, u xohlagan narsasiga erishish uchun barcha imkoniyatga ega.

💬 Ta'tilda bo'lganingizda Xabi Alonso siz bilan bog'landimi?

Ha. Jahon chempionatiga bormasligim haqida xabar berishganda, u hammasini bilgan va menga yozgan edi.

💬 Aynan nima dedi?

So'zma-so'z eslolmayman. "Xavotir olma" mazmunida edi. Umuman olganda, oddiy qo'llab-quvvatlash so'zlari.

💬 Yangi bosh murabbiyning bunday xabarini olish yoqimli bo'ldimi?

Ha, albatta.

💬 Xabi Alonso bilan ilk uchrashuvda nimalar haqida gaplashdingiz? U sizni maydonda qayerda ko'rayotganini tushuntirdimi?

Ha. U meni "o'nlik" pozitsiyasida, chiziqlar orasida, hujumchiga yaqinroq joyda ko'rayotganini aytdi. Ko'ramiz, hammasi qanday kechadi.

💬 Angliya terma jamoasiga qaytish siz uchun hozir qanchalik muhim? Bu qo'shimcha motivatsiyami?

Ochig'ini aytsam, hozir bu haqda umuman o'ylamayapman. Barcha fikrlarim "Chelsi"dagi mavsum bilan bog'liq. Shuning uchun bu meni hozir unchalik tashvishlantirmayapti.

💬 Jamoaga yangi o'yinchilar — Morgan Rojers, Maksans Lakrua kelib qo'shildi. Bunday transferlar yangi mavsum oldidan qo'shimcha ishonch bag'ishlaydimi?

Albatta. Kuchli o'yinchilarni tarkibga qo'shganingizda, jamoa kuchayishi kerak. Umid qilamanki, bizni yaxshi mavsum kutib turibdi.

Levi Kolvill "Vestern Sidney Uonderers"ga qarshi o'yin oldidan matbuot anjumanida ishtirok etdi:

O'zining tiklanish jarayoni va safga qaytishi haqida:

Men tayyorman. O'tgan mavsum oxirida o'tkazgan bir necha daqiqalarim menga mavsumoldi tayyorgarligiga yanada katta ishtiyoq bilan qaytish uchun motivatsiya berdi. Hozir to'liq tayyorman va faqat oldinga intilishni istayman.

Jarohatdan keyingi davr men uchun juda og'ir bo'ldi. Hammasi o'tgan yili mavsumoldi tayyorgarligining birinchi kunida yuz berdi va buni qabul qilish oson emasdi. Ammo men har doim hamma narsa bejizga emasligiga ishonganman, shuning uchun vaziyatni qabul qilib, qaytish uchun qo'limdan kelganini qilishga harakat qildim.

O'tgan mavsumda Chempionlar ligasida o'ynay olmaganim uchun juda qattiq qiynaldim. Yaxshiyamki, hozir yana safdaman. Nazarimda, bu sinov tufayli ham ma'nan, ham jismonan kuchliroq bo'ldim. U meni inson sifatida yaxshiroq qildi.

Xabi Alonso haqida:

Bunday murabbiy bilan ishlash men uchun katta sharaf. Hozircha hammasi a'lo darajada, mashg'ulotlar juda qiziqarli o'tmoqda. U bizdan jamoa bo'lib o'ynashimizni, to'p bilan dadil harakat qilishimizni talab qiladi va himoyachi bo'lsam ham, men aynan shu narsani istayman.

Men ko'plab murabbiylar qo'l ostida o'ynaganman, ular qat'iy pozitsiyada turishni va qolip bo'yicha harakat qilishni talab qilishardi. Ammo Alonsoda hammasi boshqacha — u: "Vaziyatni qanday ko'rsang, shunday o'yna", deydi. Bu erkin va moslashuvchan futbol.

U bizga o'zimizni ko'rsatish, uzatmalarda tavakkal qilish va to'p bilan ishlashda o'z kuchli tomonlarimizni namoyish etish erkinligini beradi. Men uchun bu ideal, chunki hujumlarni boshlashni va uzatmalar diapazonimdan foydalanishni yaxshi ko'raman, u esa menga buni qilishga ruxsat beradi.

Umid qilamanki, ertangi o'yindayoq bularning barchasini ko'rsata olamiz. Biz barchamiz bu o'yinni intizorlik bilan kutyapmiz.

"Arsenal"ga qarshi kurash va Koul Palmer haqida:

Agar hammasi rejadagidek ketsa, biz "Arsenal" bilan raqobatlashishga qodirmiz. Koulga kelsak, u bu mavsumda albatta o'z darajasiga qaytishiga ishonchim komil.

💙 Morgan Rojers Koul Palmer bilan bo'lgan aloqasi haqida gapirdi:

Koulni 14 yoshidan beri bilaman. Avval Angliya o'smirlar terma jamoalarida, keyin esa "Manchester Siti"da birga o'ynaganmiz. Biz har doim bir klubda to'p surishni orzu qilganmiz. Nihoyat bu ro'yobga chiqqanidan ikkalamiz ham juda xursandmiz.

U menga doimiy ravishda qo'ng'iroq qiladi va yozadi, ayniqsa shu hafta [kuladi]. Eng yaqin do'stlarimdan biri bilan birga o'ynash va har kuni vaqt o'tkazish imkoniyatini sabrsizlik bilan kutyapman. Bundan juda baxtiyorman.

💬 Gol nishonlash uslubingiz haqida... Ikkalangiz bir vaqtda buni takrorlasangiz, bu tarixiy lahza bo'ladi, shunday emasmi?

Ha. Ikkalamiz ham gol urishni yaxshi ko'ramiz, shuning uchun buning uchun ko'plab imkoniyatlarimiz bo'ladi. Men bunga umid qilaman.

The Telegraph muxbiri Sem Din «Chelsi»ning Morgan Rojersni 117 million funt sterling evaziga tarkibiga qo'shib olgani va bu transfer Kol Palmerning kelajagiga qanday ta'sir qilishi haqida tahliliy maqola e'lon qildi.

Morgan Rojersning «Aston Villa»dan «Chelsi»ga rekord darajadagi 117 million funtga o'tishi yozgi transferlar oynasidagi eng shov-shuvli voqealardan biri bo'ldi. Ushbu bitim bir qator savollarni yuzaga keltirdi.

Birinchidan, «Chelsi» bunday transferga qanday qodir bo'ldi? Klubning so'nggi moliyaviy hisobotlari Premer-ligadagi eng katta zarar ko'rsatkichini qayd etdi, qolaversa, jamoa kelasi mavsumda yevrokuboklarda ishtirok etmaydi.

Ikkinchidan, Rojersning kelishi Kol Palmerning kelajagiga ta'sir qiladimi, axir ikkala futbolchi ham hujumkor yarim himoyachi pozitsiyasida o'ynashni afzal ko'radi? Va nihoyat, ushbu bitimdan keyin tarkibda yana qanday o'zgarishlar bo'lishi mumkin?

The Telegraph xabariga ko'ra, «Chelsi» «BlueCo» egaligi ostida Angliyadagi eng faol klublardan biriga aylandi. Faqat 2025/26 yilgi mavsumning o'zida londonliklar 35 dan ortiq bitimni, jumladan, futbolchilarni sotib olish, sotish va ijaraga berish jarayonlarini amalga oshirdi.

O'tgan yozda «Chelsi» transferlar orqali qariyb 300 million funt ishlab topdi — bu tarkibni kuchaytirishga sarflangan mablag' bilan deyarli teng.

Bu yozda ham klub faol sotuvlarni davom ettirmoqda. Mark Kukurelya 52 million funtga «Real»ga, Andrey Santos 48 million funtga «Manchester Yunayted»ga, Tayrik Jorj esa 24 million funtga «Everton»ga o'tdi. Uchta bitim klub g'aznasiga 124 million funt keltirdi.

Asosiy jihat moliyaviy hisob-kitob qoidalarida. Futbolchini sotishdan tushgan daromad darhol to'liq hajmda hisobga olinadi, xarid xarajatlari esa shartnoma muddati davomida (maksimal besh yil) taqsimlanadi. Bu shuni anglatadiki, 117 million funtlik Rojers transferi joriy mavsum moliyaviy hisobotida klubga taxminan 23,4 million funtga tushadi. Shu bilan birga, Kukurelyaning sotuvi joriy moliya yilidagi daromadlarni darhol 52 million funtga oshiradi.

The Telegraph yozishicha, yevrokuboklarning yo'qligi sababli Xabi Alonso bunchalik keng tarkibga muhtoj bo'lmaydi. Haftaning o'rtalarida o'yinlar bo'lmagani uchun rotatsiyaga bo'lgan ehtiyoj sezilarli darajada kamayadi. Shu bois, munosib takliflar tushsa, bir qator futbolchilar «Chelsi»ni tark etishi mumkin.

Aleksandro Garnacho ketishi kutilmoqda, «Chelsi» undan 40 million funtdan ortiq mablag' olishni rejalashtirmoqda. Shuningdek, Malo Gyusto ham o'z kelajagi haqida o'ylamoqda. Bundan tashqari, yozda Trevo Chaloba, Nikolas Jekson, Aksel Disasi, Liam Delap va Filip Yorgensen klubdan ketishi mumkin.

Enso Fernandes atrofidagi vaziyat ham noaniqligicha qolmoqda. Argentinalik futbolchi jamoani o'zgartirish niyatida ekanligini bildirgan. «Chelsi» uni taxminan 120 million funtga baholamoqda.

The Telegraph tahliliga ko'ra, hozircha Rojersning o'tishi Palmerning ketishiga olib kelishi haqida hech qanday belgi yo'q. Kol Palmer «Chelsi»da «tegib bo'lmas» futbolchilar qatoriga kiradi.

Bundan tashqari, Rojers va Palmer birga o'ynashga qodir. Xabi Alonso «Bayer»da ishlagan davrida 3-4-2-1 sxemasidan foydalanib, unda ikki nafar hujumkor yarim himoyachiga joy topa olgan. Agar Alonso 4-2-3-1 sxemasini tanlasa, Rojers o'ngda, chapda yoki hujumchi ortida harakat qilib, o'yin davomida Palmer bilan pozitsiyalarini almashib turishi mumkin.

Xabi Alonso «Chelsi» bosh murabbiyi sifatidagi ilk matbuot anjumanida o'z fikrlari bilan o'rtoqlashdi:

💬 Sizni «Chelsi»dagi ishda nima ko'proq ilhomlantiradi?

«Avvalo, xayrli kun. Iliq kutib olganingiz uchun rahmat. Meni klubning o'zi, tarkib va ushbu yo'lni boshlash imkoniyati ilhomlantiradi. Biz muxlislarga ijobiy his-tuyg'ular hadya etishni, o'yinlarda g'alaba qozonishni va muvaffaqiyatga erishishni istaymiz».

💬 Ushbu chaqiriqqa qanchalik tayyorsiz?

«Men sport direktorlari va murabbiylar shtabi bilan yaqin hamkorlikda ishlashni xohlayman. Bu jamoaning salohiyati juda katta. Biz to'g'ri qarorlar qabul qilishimiz kerak. Asos allaqachon qo'yilgan, endi bizga raqobatbardosh bo'lishga imkon beradigan g'oliblik mentalitetini shakllantirishda davom etish muhim».

💬 «Chelsi»da nimaga erishmoqchisiz?

«Men ushbu jarayonning bir qismi bo'lishni istayman. Qanday o'ynashimizni, har bir o'yinga qanday yondashishimizni shakllantirish muhim. Bu mening asosiy maqsadim. Butun jamoa bilan to'liq ishlash imkoniga ega bo'ladigan lahzani intiqlik bilan kutyapman. Hozircha hammasi endi boshlanyapti, ko'rganlarimdan mamnunman, lekin, shubhasiz, yana yevrokuboklarda ishtirok etishimizni xohlayman. «Chelsi»da katta ambitsiyalar va g'alabaga chanqoqliksiz ishlashning iloji yo'q».

💬 Hozirgi futbolchilar g'alabaga qanchalik chanqoq?

«Yigitlarga o'zlari shug'ullanayotgan ish yoqayotganini ko'rish mumkin. Jamoada yaxshi energiya bor, ishtiyoq sezilib turibdi. Endi vazifamiz — sifatli tayyorgarlik ko'rish, to'g'ri poydevor qo'yish va har bir o'yinga tayyor bo'lish uchun kerakli mentalitetni shakllantirish».

💬 Futbolchilaringiz qanday fazilatlarga ega bo'lishi kerak?

«Bizga g'alabaga chanqoqlik, futbolga bo'lgan ishtiyoq va doimiy ravishda yaxshilanish istagi kerak. Premer-liga — nihoyatda raqobatbardosh chempionat. Biz maksimal darajada tayyor bo'lishimiz, har bir detalga e'tibor qaratishimiz va qanday o'ynashni xohlashimizni aniq tushunishimiz kerak. Ammo eng muhimi — o'z o'yinimizga diqqatni jamlash».

💬 Yevrokuboklarning yo'qligi rejalaringizni o'zgartirdimi?

«Faqat ayrim detallarda. Umuman olganda, avgust oyida mavsum startiga bo'lgan rejalarimiz deyarli o'zgarmadi. Biz sport direktorlari bilan doimiy ravishda birga ishlayapmiz. Qaysi pozitsiyalarni kuchaytirish kerakligi bizga tushunarli va bu yo'nalishdagi ishlar davom etmoqda».

💬 Enzo Fernandesning kelajagini muhokama qildingizmi?

«Ha, gaplashdik. Ammo tushunganingizdek, bu suhbatning mazmuni o'rtamizda qoladi».

💬 Enzoning «Chelsi»da qolishini xohlaysizmi?

«Ha».

💬 Murabbiy lavozimi siz uchun nimani anglatadi?

«Men uchun bu birgalikda ishlashni anglatadi. Biz rejalashtirish, mashg'ulot jarayoni va har bir pozitsiya uchun tarkibni qanday shakllantirish bo'yicha qarorlarni birga qabul qilamiz. Biz ustuvorliklarimiz va nimaga erishmoqchi ekanligimizni tushunishda to'liq birlikdamiz».

💬 Joze Mourinyu kabi murabbiylar izidan boryapsiz...

«Premer-liga — dunyodagi eng raqobatbardosh chempionat. Men ushbu chaqiriqni qabul qilganimdan, jamoa bilan birga rivojlanish va o'rganishdan juda xursandman. «Chelsi» tarixi hayratlanarli: ko'plab sovrinlar, buyuk futbolchilar va taniqli murabbiylar. Bu yerda bo'lish men uchun katta sharaf. Men ushbu chaqiriqqa tayyor ekanligimni his qilyapman».

💬 Koul Palmer haqida ilk taassurotlaringiz qanday?

«Biz allaqachon bir nechta mashg'ulot o'tkazdik. Birinchi kundanoq bu o'ziga xos iqtidor ekanligi ko'rinib turibdi. Bunday futbolchilarga kamdan-kam duch kelasiz. Uning o'yin sifati, futbol intellekti va maydonda qabul qiladigan qarorlari darhol ko'zga tashlanadi. U yaxshi kayfiyatda va mavsumga to'g'ri yondashuv bilan kelganidan xursandman. Biz unga bor salohiyatini ochib berishga yordam bermoqchimiz. U jamoaning asosiy o'yinchilaridan biriga aylanadi».

💬 Marko Palestra va uning moslashuvi haqida nima deya olasiz?

«Unda zamonaviy futbolchiga kerak bo'lgan barcha fazilatlar bor. U himoyachilar to'rtligida ham, beshligida ham, asosan chap qanotda o'ynay oladi. Biz unga Premer-liga talablariga moslashishiga yordam berishda davom etamiz. U jangovar ruh va g'alabaga chanqoqlik nuqtai nazaridan ajoyib mentalitetga ega».

💬 To'rt yoki besh nafar himoyachi bilan o'ynaysizmi?

«Menda allaqachon muayyan g'oyalar bor. Bu mening ishimning bir qismi. Biz dadil o'ynashni va yaxshi futbol ko'rsatishni xohlaymiz, lekin shu bilan birga to'g'ri mentalitetga ega bo'lishimiz kerak. Futbolchilar har bir o'yin vaziyatida nima qilish kerakligini tushunishlari lozim. Bu vaqt talab qiladigan jarayon».

Daily Mail nashri jurnalisti Kiran Gill "Chelsi"ning Avstraliyadagi mavsumoldi yig'ini jarayonidan qiziqarli ma'lumotlarni bo'lishdi:

🔹Avstraliyaga uchib ketishdan oldin Xabi Alonso Kobbemdagi mashg'ulot bazasida klub xodimlari uchun o'yin tashkil qildi. Bir jamoada u bilan birga kelgan mutaxassislar, ikkinchisida esa asosiy jamoa bilan ishlagan xodimlar maydonga tushdi. 7x7 formatidagi bahsda Alonso jamoasi g'alaba qozondi. Manbalarga ko'ra, ispaniyalik murabbiy bir necha bor golli uzatmalarni amalga oshirgan.

🔹Alonso "Chelsi" futbolchilarida katta taassurot qoldirmoqda. O'yinchilarning so'zlariga ko'ra, u mashg'ulotlarda hamon yuqori texnikani namoyish etmoqda va mashqlarni mayda xatolar uchun to'xtatmay, ularni o'yin sharoitiga maksimal darajada yaqinlashtirishga harakat qilmoqda.

🔹Alonso mashg'ulot jarayonidagi detallarga qattiq e'tibor qaratadi. Masalan, mashg'ulotlardan birida u Romeo Laviaga to'pni qabul qilishdan oldin atrofni tez-tez kuzatib borishni maslahat berdi.

🔹"Chelsi" Avstraliya vaqt mintaqasiga moslashishga jiddiy yondashdi. O'yinchilarni mahalliy vaqtga o'tkazish Londondan parvoz paytidayoq boshlangan, yo'lda esa jamoa qisqa mashqlar uchun Shri-Lankada to'xtagan.

🔹Alonso haftasiga uch marta 10 kilometr masofaga yugurishni odat qilgan. Sidneyda ham u o'z odatiga sodiq qolib, hatto golf o'ynashga ham vaqt topdi.

🔹"Chelsi"ning ochiq mashg'ulotiga 5 mingdan ortiq muxlis tashrif buyurdi. Muxlislardan biri Robert Sanchesga bag'ishlangan plakat ko'tarib chiqqan: "Robert Sanches Titanikni qutqara olardi".

🔹Mashg'ulotning asosiy qahramoni Alonso bo'ldi. Yakuniy hushtakdan so'ng u 25 metrlar masofadan to'pni darvozaga yo'llab, muxlislarning olqishiga sazovor bo'ldi.

🔹Sidney bazasidagi Wi-Fi paroli "Football Is Coming Home" iborasidan iborat edi. Aynan shu yozuv yonida Levi Kolvill va Koul Palmer Angliya terma jamoasining JCh qaydnomasiga kirmaganliklari haqida intervyu berishdi.

🔹Koul Palmer jurnalistlar bilan muloqot qilish uchun o'zi tashabbus ko'rsatgan. U o'zining yaqin do'sti Rojers haqida ham gapirib o'tdi. Klubda 2026/27 yilgi mavsum Palmer uchun avvalgisidan ko'ra muvaffaqiyatliroq o'tishiga umid qilishmoqda.

🔹Birinchi jamoa bilan birga akademiyaning yosh tarbiyalanuvchilari, jumladan 16 yoshli Reji Uotson va Mahdi Nikoll-Jazuli ham Avstraliyaga yo'l olishdi. Murabbiylar shtabi o'smirlar bo'sh vaqtini telefonda o'tkazmasligi uchun qayiqda sayr kabi turli tadbirlar tashkil etdi.

🔹Tajribali futbolchilar esa homiylar oldidagi majburiyatlarni bajarishdi. Levi Kolvill, Aaron Anselmino va Tosin Adarabioyo Bondi-Bich plyajiga tashrif buyurishdi. Koul Palmer, Joao Pedro, Dariu Essugu va Liam Delap esa TMGM shtab-kvartirasida savol-javob sessiyasida qatnashishdi.

🔹Klub ichida Mixail Mudrikning qaytishi ijobiy qabul qilindi. Futbolchilar uning diskvalifikatsiyasi bekor qilinganini muhokama qilishmoqda va vingerning ikki yillik tanaffusdan so'ng yana maydonga qaytishidan xursand.

Xabi Alonso «Tottenhem»ga qarshi o'yin oldidan matbuot anjumanida qatnashdi. Quyida murabbiyning asosiy fikrlari:

Maksans Lakrua haqida:

Maksansni Bundesligadagi vaqtlaridan beri bilaman, ammo u APLda juda o'sib ketdi deb hisoblayman. Gap faqat maydondagi o'yin haqida ketmayapti. Bu uning shaxsiyati va yetakchilik qobiliyatlariga ham tegishli – bularning barchasi unda bor. U mudofaa chizig'imizga kuch va barqarorlik bag'ishlaydigan juda ishonchli futbolchi. Ishonchim komilki, u jamoa o'yiniga darhol jiddiy ta'sir ko'rsata oladi. U kuchli xarakterga ega. U g'alaba qozonishni istaydigan va g'olib mentalitetiga ega yetuk futbolchi. Bundan tashqari, u himoyalanishni yaxshi ko'radi, bu menga ham juda yoqadi.

Koul Palmer bilan ishlash bo'yicha dastlabki taassurotlar:

U juda yaxshi ruhiy holatda ekanligini ko'ryapman. Uning kayfiyati to'g'ri, futbol haqida va jamoaga nima kerakligi haqida gaplashishga ochiq. Uning jamoadagi roli juda muhim, u maydondagi yetakchilardan biri bo'ladi. Koul qanchalik yaxshi o'ynasa, «Chelsi» shunchalik kuchli bo'ladi. Bunda hech qanday shubha yo'q. U uchun to'liq mavsumoldi tayyorgarligini o'tkazish juda muhim. U bunga to'liq e'tibor qaratganini ko'rish mumkin. Biz bir-birimizni yaxshi tushunamiz, o'zaro tushunish bor va menga uning xarakteri juda yoqadi.

Palmerga nimadir isbotlash kerakmi degan savolga:

Menga shunday tuyuladiki, u shunchaki futbolni yaxshi ko'radi va o'yindan zavq olishni istaydi. U zavq olganda, bu darhol ko'zga tashlanadi – bu uning o'yinida aks etadi. Uning vazifasi – futboldan zavqlanish va o'zining eng yuqori darajasini ko'rsatish. U nimaga qodirligini allaqachon ko'rsatgan va ishonchim komilki, bu mavsumda u haqiqatan ham ajoyib yil o'tkazish uchun katta ishtiyoqqa ega.

Palmerning maydondagi erkinligi haqida:

Intizom erkinlik beradi deb hisoblayman. Jamoada aniq tamoyillar va o'yin mexanizmlari bo'lsa, futbolchilarda qaror qabul qilish, o'z iqtidorini va eng yaxshi fazilatlarini namoyon etish imkoniyati paydo bo'ladi. Ammo kuchli jamoa bo'lishni istasak, barcha rioya qilishi shart bo'lgan bazaviy tamoyillar bor. Ishonchim komilki, barcha futbolchilar buni tushunishadi, chunki zamonaviy futbol aynan shunday tuzilgan. Bu Koulga ham, Joau Pedruga ham, Morgan Rojersga ham, Jeymi Gittensga ham, Dastan Satpayevga ham – barcha hujumkor o'yinchilarimizga tegishli. Ular bu yondashuvni bo'lishishlari kerak va ular buni allaqachon qilishmoqda.

Laviya haqida:

U ertaga maydonga tushishga tayyor.

Kaysedo haqida:

Uni kecha ko'rganimda, yarim himoyachilarimni qanchalik sog'inganimni tushundim. Men uzoq vaqtdan beri unga chetdan turib qoyil qolib kelaman. Uning klassi, xarakteri va mentaliteti ko'rinib turibdi. Ekvadorlik futbolchilarni yaxshi bilaman – ular o'ziga xos. Moyzes haqida ko'p yaxshi narsalar eshitganman, telefon orqali gaplashganmiz, lekin kecha birinchi marta shaxsan ko'rishdik. Bu yuqori darajadagi futbolchi. Men uchun u hech qanday shubhasiz dunyodagi eng yaxshi tayanch yarim himoyachilardan biri. Endi u shu yerda va unga yanada kuchliroq bo'lishiga yordam berish uchun birga ishlash vaqti keldi.

Markaziy himoyachilarning optimal soni haqida:

To'rt yoki besh – bu javob sizni qoniqtiradimi? [kuladi]

FIFA mojarosi haqida:

Futbol xususiy qo'llarda emas, balki odamlarga tegishli bo'lishi kerak deb hisoblayman. Biz uni aynan shunday sevamiz. Biz ajoyib jahon chempionatini ko'rdik va futbolni sevuvchi barchaning manfaatlarini himoya qilish juda muhim. O'ylaymanki, futboldagi ko'pchilik bir fikrda: biz o'yin umumiy bo'lishini, u hammaga tegishli bo'lishini istaymiz. Umid qilamanki, bu sodir bo'lmaydi. Biz futbolni o'zimiz sevganidek – jozibali va haqiqiy holatda saqlab qolishimiz kerak. Aynan shuning uchun u shunchalik ko'p his-tuyg'u va ehtiros uyg'otadi. Biz buni JCHda, EChLda, APLda – barcha turnirlarda ko'rdik. Chunki futbol hamma uchun mavjud. Kimdir bu shunchaki kichik o'zgarish deb aytishi mumkin. Ammo 20 ishtirokchili formatga rozi bo'lsangiz, keyin o'zingizni 51 ta ishtirokchi bilan topasiz. Biz esa buni istamaymiz.

🎙 Xabi Alonso «Tottenxem»ga qarshi o'yin oldidan matbuot anjumanida qatnashdi [1-qism]:

💬 Maksans Lakrua — bu siz shaxsan uzoq vaqt kuzatib kelgan va sotib olishni istagan o'yinchi bo'lganmi?

Maksansni Bundesligada ishlagan vaqtimdan beri bilaman. O'ylaymanki, uning o'sishi va Premer-ligaga moslashuvi tahsinga loyiq. Gap faqat maydondagi o'yin haqida emas, balki uning shaxsiyati, yetakchilik qobiliyatlari — undagi barcha jihatlar haqida ketyapti. Bu juda ishonchli o'yinchi, u himoyamizga kuch qo'shadi. U jamoaga darhol jiddiy ta'sir o'tkaza olishiga ishonchim komil. Bu ham bugungi kun, ham kelajak uchun ajoyib transfer.

💬 Uning xarakteri haqida gapiradigan bo'lsak, uni yetakchi deb atash mumkinmi?

U kuchli xarakterga ega. U yetuk inson, g'alaba qozonishni istaydi, g'oliblik mentalitetiga ega. Qolaversa, u himoyalanishni yaxshi ko'radi, menga ham bu juda yoqadi.

💬 Sidneyda bo'lish sizga qanday taassurot qoldiryapti?

Hozircha hammasi a'lo darajada. Bu yerga, Avstraliyaga kelish — ajoyib tajriba. Bu yerda sportni juda yaxshi ko'rishadi, nafaqat futbolni, balki boshqa ko'plab turlarni ham. Biroq futbol ham bu yerda juda ommabop va katta qo'llab-quvvatlashga ega. Buni mashg'ulotlarda ko'rdik, o'yinda ham ko'rdik va ertaga ham ajoyib muhit kutmoqdamiz. Har kuni odamlarning energiyasini ko'proq his qilyapmiz. Bu yerdagi sharoitlar ajoyib. Sidney haqida gapiradigan bo'lsak, hammasi eng yuqori darajada tashkil etilgan va biz juda mamnunmiz.

💬 Shanba oqshomida Olimpiya stadionida 80 mingdan ortiq tomoshabin yig'ilishi mumkin. Bunday muhit mavsumga tayyorgarlikda sizga qanchalik yordam beradi?

Albatta, aynan shunday o'yinlarni o'tkazishni istaysan. Hatto bu o'rtoqlik uchrashuvi bo'lsa ham, atrofda ajoyib muhit bo'lsa, tribunalar shovqinini eshitsang, muxlislarning hissiyotlarini his qilsang, bu o'yinni chuqurroq his qilishga yordam beradi. Bunday lahzalarda muhit rasmiy o'yinlardagiga yaqinroq bo'ladi.

💬 Birgalikda ishlagan vaqtingiz davomida Koul Palmer siz uchun qanday o'yinchi bo'lib chiqdi?

Hozir u juda yaxshi ruhiy holatda ekanligini ko'ryapman. Uning kayfiyati a'lo. U futbol haqida, jamoaga nimalar kerakligi, o'zining jamoadagi roli haqida gaplashishga ochiq. U maydonda yetakchilardan biriga aylanishi kerak. Koul qanchalik yaxshi o'ynasa, «Chelsi» shunchalik kuchli bo'ladi. Bu aniq. O'ylaymanki, u uchun to'laqonli mavsumoldi tayyorgarligini o'tkazish, mashg'ulotlarda yaxshi ishlash juda muhim. U bunga to'liq e'tibor qaratganini ko'rish mumkin. Biz asta-sekin bir-birimizni kashf qilyapmiz, bir-birimizni yaxshiroq tushuna boshladik va menga uning xarakteri juda yoqadi.

💬 Bizga bu yerdan Yevropadagi yangiliklarni kuzatish qiyinroq. FIFA va jahon chempionati atrofidagi vaziyat haqida nimalar deb o'ylaysiz?

O'ylaymanki, futbol xususiy qo'llarda emas, balki odamlarga tegishli bo'lishi kerak. Biz uni aynan shunday sevib qolganmiz. Biz ajoyib jahon chempionatiga guvoh bo'ldik va barcha odamlarning manfaatlarini himoya qilish muhim. Nazarimda, futbol bilan bog'liq ko'pchilik bu sport turi umumiy boylik bo'lib qolishini, u hammaga tegishli bo'lishini istaydi. Umid qilamanki, bunday bo'lmaydi. Biz futbolni o'zimiz sevganidek — jozibali va haqiqiy holatda saqlab qolishimiz kerak.

Aynan shuning uchun u shunday hissiyotlar va ehtiros uyg'otadi. Biz buni jahon chempionatida ko'rdik, Chempionlar ligasida, Premer-ligada va boshqa barcha turnirlarda ko'rdik. Bularning barchasi aynan futbol hammaga tegishli bo'lgani uchun mavjud. Va biz buni qancha uzoq vaqt saqlab qolsak, shuncha yaxshi. Hozir gap faqat kichik qism haqida ketayotganini tushunaman, ammo yigirma foizdan boshlasangiz, ellik bir foiz bilan yakunlashingiz mumkin. Biz esa buni istamaymiz.

💬 Koul Palmerda bu mavsumda nimadir isbotlash istagi bormi?

Nazarimda, u shunchaki futbolni juda yaxshi ko'radi va o'yindan zavq olishni istaydi. U zavq olganida aynan o'zining eng yaxshi futbolini ko'rsatadi. U maydonda o'zini aynan shunday ifoda etadi. Shuning uchun uning uchun eng muhimi — o'yindan lazzatlanish va o'zining maksimal darajasini namoyish etish. U nimalarga qodirligini allaqachon ko'rsatgan va ishonchim komilki, bu mavsumda u ajoyib yil o'tkazish uchun katta ishtiyoqqa ega.

Morgan Rojersning ilk intervyusi. Asosiy jihatlar

Xabi bilan suhbat haqida:

Biz allaqachon bir necha bor gaplashib oldik. Men uchun bu yerga kelib, u qanday murabbiy ekanligini, qanday fikrlashini va qanday futbol ko'rishni istashini tushunib olish muhim edi. Uning g'oyalari mening o'yinga bo'lgan qarashlarim bilan to'liq mos keladi – men ham erkin o'ynashni, o'z kuchli tomonlarimni namoyish etishni istayman. Aynan u jamoani boshqarayotgani transferimning asosiy sabablaridan biri bo'ldi.

Futboldan tashqari qiziqishlari haqida:

Men NBAning katta muxlisiman. O'zim hech qachon o'ynamaganman – agar shunday deganimda akam darrov ustimdan kulgan bo'lardi. Lekin basketbolni juda yaxshi ko'raman, «Golden Steyt»ga muxlislik qilaman.

O'z o'yin uslubini qanday ta'riflashi haqida:

Men maydonda erkinlikni yoqtiradigan futbolchiman, deb aytgan bo'lardim. Tavakkal qilishni, vaziyatlar yaratishni, o'yin borishini o'zgartirishni va natijaga ta'sir o'tkazishni yoqtiraman. Bu gol bo'ladimi, golli uzatma yoki boshqa biror narsa. Hatto himoyada ham jamoaga maksimal foyda keltirishni va o'yinga ta'sir qilishni istayman. Men doimo o'yin taqdirini hal qila oladigan futbolchi bo'lishga intilaman. Muxlislarga nega bu yerda ekanligimni ko'rsatib qo'ymoqchiman.

Palmer bilan do'stligi haqida:

Koul bilan taxminan 14 yoshimizdan beri tanishmiz. Avval Angliya o'smirlar terma jamoasida kesishganmiz, keyin esa «Siti»da birga bo'lganmiz. Biz qachondir birga o'ynashni orzu qilganmiz va endi bu haqiqatga aylandi. Ikkalamiz ham bundan juda xursandmiz. U menga tinmay qo'ng'iroq qiladi va xabar yozadi, men ham birga o'ynashni intiqlik bilan kutyapman. U juda baxtli! U menga hech qachon bunchalik ko'p yozmagan.

Terma jamoada Ris Jeyms bilan suhbatlashgani haqida:

Ris bilan ancha batafsil gaplashib oldim. Jamoa sardori sifatida u bu klubni juda yaxshi biladi va menga hamma narsani aytib berdi. Men muhitni his qilishni, qanday joy ekanligini tushunishni istadim, shuning uchun to'g'ri qaror qabul qilganimga ishonch hosil qilish uchun unga ko'plab savollar berdim. Ammo u jamoa, kollektiv, murabbiy bilan suhbatlari va klub qaysi yo'nalishda ketayotgani haqida gapira boshlagach, bu loyihaning bir qismi bo'lishni juda istayotganimni angladim. Ris doimo rostini gapiradi. Uni anchadan beri bilaman, u har doim shunday bo'lgan. Shu sababli, bu transferni muhokama qilish uchun u eng ideal inson edi.

Koul Palmer:

"Chelsida hayotimdagi eng yaqin do'stlarimdan biri bilan o'ynash... 💙"

Ben Jacobs xabariga ko'ra, «Chelsi» Morgan Rojersga jamoadagi o'rni bo'yicha aniq rejani taqdim etgan — uni asosiy chap qanot vingeri sifatida ko'rishmoqda.

Rojers «o'nlik» pozitsiyasida ham birdek ishonchli harakat qila oladi va uning universalligi «ko'klar» uchun asosiy omillardan biri bo'lgan.

Biroq futbolchiga u jamoaga aynan hujumning chap qanotida, Koul Palmer bilan yonma-yon o'ynash uchun o'tayotgani ma'lum qilingan.

Rojersni «Chelsi»ga o'tishga ko'ndirishda Xabi Alonso va Bexdad Egbali muhim rol o'ynagan.