Kardiff va Roma o'rtasidagi o'rtoqlik o'yinida Paulo Dibala va Brayan Kristante o'rtasida janjal yuz berdi. Voqea tafsilotlari bilan tanishing.
Kardiffning Romaga qarshi o'yinida Paulo Dibala va Brayan Kristante o'rtasida keskin vaziyat yuzaga keldi. Voqea Tanner gol urib, hisobni 4:1 ko'rinishiga keltirganidan so'ng sodir bo'ldi va bu holat jallorossilarning g'azabini keltirdi.
Roma vakillari hujum rivojlanayotgan pallada Santyago Kastroga nisbatan qoida buzilgan deb hisoblashdi. Hakam o'yinni davom ettirishga ruxsat berdi va ko'p o'tmay Kardiff gol urdi. Ushbu qaror Rim klubi noroziligiga sabab bo'ldi, Matias Sule esa jamoadoshini himoya qilgan holda hakamga e'tiroz bildirdi va sariq kartochka oldi.
Ayni shu lahzada Dibala va Kristante o'rtasida nizo kelib chiqdi. DAZN kadrlari ularning qizg'in bahsini ko'rsatdi, vaziyatni yumshatish uchun boshqa futbolchilar aralashishiga to'g'ri keldi. Argentinalik futbolchi sardordan hakamga nisbatan qat'iyroq pozitsiya egallashni talab qilgandek ko'ringan bo'lsa, Kristante vaziyatni tinchlantirishga harakat qilgan.
O'rtoqlik uchrashuvi bo'lishiga qaramay, jamoa yetakchilari o'rtasidagi bu keskinlik e'tibordan chetda qolmadi.
Brayan Kristante "Roma" bilan shartnomasini 2028-yilga qadar uzaytirdi. Yarim himoyachi klub safida 364 ta o'yin o'tkazgan.
"Roma" Brayan Kristante bilan shartnoma 2028-yilga qadar uzaytirilganini e'lon qildi.
2018-yil yozida poytaxtga kelgan yarim himoyachi "jallorossi" safidagi uzoq yo'lini davom ettirmoqda. U shu yillar davomida ham maydonda, ham maydon tashqarisida jamoaning muhim figurasiga aylandi. Bugungi kunga qadar Kristante 364 ta o'yin o'tkazib, chempionat va kubok bahslarida 21 ta gol urishga erishdi. Ushbu ko'rsatkichlar unga 1927-yildan buyon klub safida eng ko'p o'yin o'tkazgan futbolchilarning kuchli o'nligidan joy olish imkonini berdi. Tabriklaymiz, Brayan!
Brayan Kristante «Roma»dagi faoliyati, Rimdagi bosim, Mourinyu va Gasperini haqida gapirdi.
So'nggi sakkiz yilni poytaxtda, «jallorossi» libosida o'tkazgan Brayan Kristante Gazzetta dello Sport nashrining Sportweek loyihasiga bergan katta intervyusida o'z taassurotlari bilan o'rtoqlashdi.
💬 «Roma» safidagi 364 ta o'yin: qaysi uchtasi yodingizda qolgan?
🗣 «Oh, xudo... Eng yodda qolgan uchtasi... Ikki final, albatta. Birinchisi — Konferensiyalar ligasi, unda «Feyenoord»ni mag'lub etganmiz, ikkinchisi esa Yevropa ligasi finali, unda penaltilar seriyasida «Sevilya»ga yutqazganmiz. Keyin, tafsilotlarga kirmayman, bu mavsumning so'nggi turida Veronadagi o'yinni aytaman, o'shanda Chempionlar ligasiga qaytishni ta'minlaganmiz — bu klub, o'yinchilar va muxlislar juda uzoq kutgan voqea edi».
💬 Rimdagi sakkiz yil boshqa klub va shahardagi shu davrdan ikki barobar og'irmi?
🗣 «Aslo... Rimga birinchi kundanoq oshiq bo'lib qolasiz. Kelasiz va qayerga qaramang, uning go'zalligidan hayratga tushasiz. Stadion esa o'ziga xos narsa beradi: «Roma» muxlislarining energiyasini men kashf qilganim yo'q; Venditti qo'shig'i ohangidagi madhiya tanangizni junjiktiradi. Bu, shubhasiz, ko'p narsa talab qiladigan shahar va bu har doim ham oson emas. U beradigan barcha narsa — iliqlik, ishtiyoq va ehtiros — hammasi yaxshi ketayotganda bosimga, stressga aylanadi va agar natija bo'lmasa, buni yengish oson emas. Bu medalning ikkinchi tomoni».
💬 Bundan qanday qutulish mumkin?
🗣 «Muvozanatni saqlashni bilish kerak. Rimda eyforiya depressiyaga juda tez almashadi; bugun sen chempionsan, ertaga esa mag'lub... Shunday qilib butun mavsumni barbod qilish mumkin. Bu yil yutdikmi yoki yutqazdikmi, o'yindan keyin darhol diqqatni jamlab, keyingi bahsga tayyorgarlik ko'rishni yaxshi uddaladik».
💬 «Roma» kabi jamoa sardori bo'lish nimani anglatadi?
🗣 «Bu oddiy tuyulishi mumkin, lekin men uchun shunday ulkan shahar nomini olgan jamoa sardori bo'lish katta sharaf. Pellegrini va Manchini bilan birga yosh o'yinchilarga ushbu klubga mansublik hissini singdirayotganimdan faxrlanaman».
💬 Mourinyu va Gasperini sizga nimalar berdi?
🗣 «Mourinyu nafaqat menga, balki butun jamoaga aniqlik olib kirdi. U bizga o'z xarizmasini, g'alaba qozonish tushunchasini singdirdi; g'alaba qozonishga bo'lgan ehtiyojni, desam bo'ladi. U bilan ikki ajoyib mavsumni o'tkazdik, bitta kubok yutdik, ikkinchisida penaltilar seriyasida yutqazdik. Murabbiy Gasperini kuchli, buni inkor etib bo'lmaydi. «Atalanta»da u bilan ishlash baxtiga muyassar bo'lganman, unga ergashish kerakligini bilardim, chunki u hamma joyda katta muvaffaqiyatlarga erishgan va buni hatto shunday talabchan klubdagi birinchi yilidayoq isbotladi».
💬 Sizni har bir murabbiy uchun ajralmas qiladigan narsa nima?
🗣 «Men mehnatkash odamman. Maydonga tushishni, har kuni ishlashni va doimo formada bo'lishni, murabbiy talab qilgan narsani bajarishni yaxshi ko'raman. Bolaligimdan doim bor kuchimni berib kelganman».
Juzeppe Rizo himoyachi Janluka Manchini «Roma»da qolish uchun jiddiy takliflarni rad etgani hamda Brayan Kristantening klubga sodiqligi haqida gapirdi.
Manchini va Kristantening agenti Juzeppe Rizo fcinter1908.it nashriga bergan intervyusida himoyachining «Roma»da qolish qarori haqida gapirib o'tdi.
Men uni sotmoqchi edim va «Roma»dan olib ketmoqchi edim, ammo u «Roma» uchun hammasidan voz kechdi. Men unga aqldan ozganini aytdim, lekin u qilayotgan ishidan mamnun.
Agent qo'shimcha qildi:
Unga katta pul evaziga jiddiy takliflar tushgandi va men uni sotgan bo'lardim. Gasperini va D'Amiko uni ishontirishda mendan ko'ra ko'proq yordam berishdi.
Shuningdek, Rizo o'zining yana bir mijozi Brayan Kristante haqida ham to'xtalib o'tdi:
Brayan — sardor va u hech qachon «Roma»dan ketish haqida o'ylamagan. U «jallorossi» safida 360 ta o'yin o'tkazdi... u abadiy «Roma» tarixida qoladi.
Brayan Kristante "Roma"ning yangi mavsumdagi maqsadlari, Chempionlar ligasi va Pellegrinining jamoaga qaytishi haqida gapirdi.
"Trastevere" ustidan qozonilgan g'alabadan so'ng Brayan Kristante Trigoriya qarorgohida jurnalistlar bilan suhbatlashib, "Roma"dagi hozirgi holat haqida gapirib berdi.
💬 Mashg'ulotlar yig'ini qanday o'tmoqda? Yangi futbolchilarni kutmoqdamisiz?
🗣 "Yaxshi, biz samarali ishlamoqdamiz, barqarorlik ko'rsatyapmiz va mavsumni kuchli boshladik. Mashaqqatli mehnat qilyapmiz. Kimdir albatta keladi, klub bu borada harakat qiladi".
💬 Pellegrini bu yerda emas, u haqida biror narsa eshitdingizmi?
🗣 "Ha, biz uni quchoq ochib kutmoqdamiz, imkon qadar tezroq jamoaga qaytishiga umid qilamiz".
💬 "Roma"ning kelasi mavsum uchun rejalari haqida:
🗣 "Biz barqarorlikni saqlab qolishimiz va rivojlanishimiz kerak. Bu yil biz Chempionlar ligasida ham ishtirok etamiz va muvaffaqiyat qozonishni istaymiz. Hozir aniq maqsadlar qo'yish oson emas".
💬 Chempionlar ligasidan nimalar kutyapsiz?
🗣 "Biz eng kuchlilar bilan to'qnash kelamiz, hatto birinchi bosqichning o'zida ham. Biz tayyor bo'lishimiz kerak va tayyor bo'lamiz".
Roma Zeki Chelik, Brayan Kristante va Janluka Manchini bilan shartnomalarni uzaytirmoqda. Fabrisio Romano tafsilotlarni ma'lum qildi.
Roma shartnomalarni uzaytirish jarayonini yakunlamoqda va asosiy o'yinchilarni jamoada saqlab qolishni ta'minlamoqda.
Fabrisio Romano xabariga ko'ra, Zeki Chelik bilan shartnomani uzaytirish jarayoni yakunlandi: turkiyalik himoyachi kerakli hujjatlarga imzo chekib bo'ldi. Lorenso Pellegrini bo'yicha kelishuv ham oldinga siljimoqda, klub egalarining roziligi kutilmoqda.
Brayan Kristante bilan shartnoma ham tayyor: kelishuvga erishildi va hujjatlar imzolanishi qoldi, ammo yarim himoyachining shartnomasini uzaytirish masalasi hal bo'lgan deb hisoblanadi. Xuddi shu holat Janluka Manchini uchun ham amal qiladi: Roma himoyachi bilan to'liq kelishuvga erishdi, rasmiy imzolash qoldi.
Romano Manchini kelajagi borasida bir jihatga aniqlik kiritdi:
Inter hech qachon jallorossi himoyachisini xarid qilishga yaqin bo'lmagan va unga nisbatan aniq qiziqish bildirmagan.
