Neftchi futbolchilari jarohat oldi
Neftchi futbolchilari Abrorbek Ismoilov, Asilbek Jumayev va Yovan Jokich jarohat oldi. Ularning tiklanish muddatlari ma'lum qilindi.
Afsuski, so‘nggi uchrashuvlar jamoamiz uchun nafaqat natija, balki jarohatlar bilan ham yodda qolmoqda. Hozirda bir nechta futbolchimiz tiklanish jarayonini boshdan kechirmoqda.
Abrorbek Ismoilov “Buxoro”ga qarshi bahsda o‘ng qovurg‘asidan jarohat oldi. Tibbiy tekshiruvlar xulosasiga ko‘ra, himoyachimiz taxminan bir oy davomida davolanish va tiklanish jarayonida bo‘ladi.
Asilbek Jumayev “So‘g‘diyona”ga qarshi uchrashuvda o‘ng tizzasidan jarohat olganiga qaramay, haqiqiy xarakter namoyish etib, “Navbahor”ga qarshi vodiy derbisida ham jamoasiga yordam berish uchun maydonga tushdi.
Tibbiy xulosaga ko‘ra:
o‘ng tizza bo‘g‘imi va sonning pastki qismi lat yegan;
o‘ng tizza bo‘g‘imida posttravmatik gemartroz aniqlangan.
Zarur tibbiy muolajalar amalga oshirildi, MRT tekshiruvi tayinlandi. Futbolchimizning taxminiy tiklanish muddati 7–10 kun etadi.
Yovan Jokich esa “Navbahor”ga qarshi uchrashuv oldidan chigalyozdi mashg‘ulotlari vaqtida avvalgi o‘ng Axill payi jarohatini qayta his qildi. Batafsil tekshiruvlardan so‘ng Axill payidagi muammo jarrohlik yo‘li bilan davolanishi belgilandi.
Tajribali legionerimiz yaqin kunlarda Yevropada jarrohlik amaliyotini o‘taydi. Rejaga ko‘ra, u 3–4 oy davom etadigan tiklanish jarayonidan so‘ng mashg‘ulotlarga qaytadi.
“Neftchi” PFK rahbariyati, murabbiylar shtabi, jamoa a’zolari va ko‘p sonli muxlislarimiz nomidan barcha jarohat olgan futbolchilarimizga tezroq sog‘ayib, maydonga yanada kuchliroq holatda qaytishlarini tilaymiz.
Biz bir oilamiz. Har qanday sinovdan ham birgalikda o‘tamiz. Sog‘ayib qayting, yigitlar!
