Roma Krisensio Sammervillni kutmoqda, ammo vaqt tig'iz. Vest Xem vingeri Jan Pero Gasperini uchun asosiy nishon bo'lib qolmoqda, murabbiy aynan u jamoa hujumini kuchaytira olishiga ishonadi. Biroq Aston Villa tomonidan raqobat kuchaygani sababli, Trigoriya rahbariyati muqobil variantlarni ko'rib chiqmoqda.
Il Romanista xabariga ko'ra, Leyptsig vingeri Antonio Nusa hamon asosiy nomzodlardan biri hisoblanadi. Agar Sammervill bilan kelishuv amalga oshmasa, Rim klubi norvegiyalik futbolchiga murojaat qilishi mumkin. Nusa Rimga o'tishga tayyor, uning maoshi jamoa byudjetiga mos keladi, biroq transfer summasi masalasida hamon savollar bor. Roma bu transfer uchun bonuslar bilan birga 40-45 million yevrodan ortiq mablag' sarflashni istamayapti.
Corriere dello Sport ma'lumotiga ko'ra, Roma Ayyaks vingeri Mika Godts nomzodini ham o'rganmoqda. O'tgan mavsumda 44 ta o'yinda 17 ta gol va 15 ta golli uzatmaga mualliflik qilgan belgiyalik futbolchi Rim klubi talablariga to'liq javob beradi. Uning transfer qiymati ham 40-45 million yevro atrofida baholanmoqda, ammo maosh borasida Godts Sammervillga qaraganda ancha arzonroq variant hisoblanadi.
Vaziyat aniq: Sammervill Gasperini uchun birinchi raqamli tanlov, ammo Roma kutib o'tirishni istamayapti. Nusa va Godts — moliyaviy jihatdan qulayroq bo'lgan muqobil variantlar.
Izohlar (0)
Izoh qoldirish uchun tizimga kiring.
Hozircha izoh yo'q. Birinchi bo'lib fikr bildiring!