O‘zbekiston U-20 qizlar terma jamoasi CAFA turnirini g‘alaba bilan boshladi

Bugun Tojikiston Respublikasida 20 yoshgacha bo‘lgan qizlar o‘rtasidagi CAFA U-20 Women’s Championship 2026 musobaqasiga start berildi.

Turnirning ochilish uchrashuvida Viktoriya Sirota boshqaruvidagi O‘zbekiston U-20 qizlar terma jamoasi Qirg‘iz Respublikasi terma jamoasiga qarshi maydonga tushdi. Murosasiz kechgan bahsda vakillarimiz 1:0 hisobida g‘alaba qozondi.

Uchrashuvdagi yagona gol 12-daqiqada kiritildi. Shahnoza Dekanboyevaning aniq va chiroyli uzatmasidan so‘ng Shahzoda Alixanova raqib darvozasini ishg‘ol qilib, jamoamizga g‘alaba keltirdi. Shu tariqa O‘zbekiston U-20 qizlar terma jamoasi turnirdagi ishtirokini muhim uch ochko bilan boshladi.

Eslatib o‘tamiz, jamoamiz musobaqadagi navbatdagi uchrashuvini 23-iyul kuni Eron U-20 terma jamoasiga qarshi o‘tkazadi.