Ferran Torres transferi bo'yicha vaziyat: narx va shartnoma tafsilotlari

Tanzi Ferran Torresning transfer qiymati haqida fikr bildirdi:

«Narxni taxminan baholash mumkinmi? Transfer narxlari bilan har doim qiyin, chunki hamma narsani bozor belgilaydi. Jahon chempionatigacha, o'ylaymanki, oqilona muzokaralar bilan uni 10-20 million yevroga sotib olish mumkin edi. Uning shartnomasida bir yil qolgandi va agar siz yagona da'vogar bo'lsangiz, futbolchi esa shartnomani uzaytirmoqchi bo'lmasa, kelishib olish ancha oson.

Ammo endi, agar «Barselona» uning shartnomasini uzaytirmoqchi bo'lsa va shu bilan birga yana ikki-uchta manfaatdor klub paydo bo'lsa, narx uch baravar oshishi mumkin. Bu oddiy talab va taklif. Shuning uchun futbolchining qiymatini oldindan belgilash har doim qiyin.

Agar ertaga «Liverpul» kelib: «Biz Ferran Torresni sotib olmoqchimiz», desa, avvalgi summani to'lab bo'lmaydi».

Ferranning shartnomasini uzaytirish istagi haqida gapiradigan bo'lsak, kataloniyaliklarning Sport nashri yozishicha, klub futbolchining PSJga o'tib ketmasligi uchun shartnomani yangilamoqchi.

Shu bilan birga, The Athletic jurnalisti Pol Balyus «Barselona» futbolchining klubdagi faoliyatini uzaytirgan taqdirda «Manchester Siti»ga 7-8 million yevro to'lashi kerakligini ta'kidlaydi.

Bir hafta oldin PSJ bonuslar bilan birga 45 million yevro taklif qilishga tayyorligi, «Barselona» esa 50 million yevro olishni kutayotgani xabar qilingan edi. So'nggi kunlarda shartnomani uzaytirish istagi haqida mish-mishlar tarqaldi, ammo Ferranning o'zi bu borada nima deb o'ylayotgani noma'lum.